Vrugtegids vir diabete: die beste lys porsiegroottes nóg

Mag diabete vrugte eet? Dit is iets wat baie mense in ons diabetesgemeenskap vra. Ons het die dieetkundige en diabetes-opvoeder Louise Ferreira vir wenke genader.

Alles oor vrugte 

Vrugte is ’n goeie bron van talle noodsaaklike vitamiene en minerale soos kalium, vitamien C en foliensuur, asook vesel. Hierdie voedingstowwe is belangrik vir die voorkoming van siektes, ’n gesonde spysverteringstelsel, en ’n gesonde vel en hare. As jy diabetes het, mág en móét jy vrugte eet. Kyk hier hoe jy kan keer dat dit jou bloedsuikervlakke opstoot.

Mag diabete vrugte eet?

Vrugte kan vars, gevries, geblik, gedroog en versap geniet word. Dit is egter wys om vrugte onverwerk en vars te eet. Hier is die redes:

• Sap: Wanneer sap uit vrugte druk word, gaan baie vesel en voedingstowwe verlore, en die sap word ’n verfynde koolhidraat.
• Gedroog: Gedroogde vrugte laat porsies kleiner lyk en dit verhoog die versoeking om meer as een of twee porsies te eet.
• Geblik: Vrugte in blikkies word dikwels ingelê met ekstra suiker, wat vermy moet word.

Porsiebeheer vir vrugte

Oor die algemeen moet die meeste mense mik vir twee tot drie porsies vrugte per dag. (Onthou egter dat elke mens verskil, en as vrugte neig om jou bloedsuikervlakke op te stoot, moet jy liefs na jou liggaam luister.) Elke porsie vrugte bevat 15 g  koolhidrate – vir diegene wat koolhidrate tel om hul insuliendosis te bereken.

Een vrugteporsie is:

• 1 klein tot mediumgroot vars vrug;
• 125 ml (½ koppie) geblikte vrugte of vrugtesap; of
• ¼ koppie droë vrugte.

Elke porsie vrugte bevat 15 g  koolhidrate – vir diegene wat koolhidrate tel om hul insuliendosis te bereken.

Appels, met skil	1 klein (120 g)
Appelkose	4 mediumgroot (150 g)
Piesang	1 klein (80 g)
Kersies	12 (100 g)
Vye	2 groot (100 g)
Vrugteslaai	½ koppie (125 ml)
Grenadellas	6 groot (200 g)
Pomelo’s	1 mediumgroot (230 g)
Druiwe	15 klein (100 g)
Koejawels	2 groot (300 g)
Kiwivrugte	1 groot (110 g)
Mango’s	½ klein (½ koppie )
Lemoene	1 mediumgroot (180 g)
Papaja, blokkies	1½ koppies (175 g)
Perskes of nektariens	1 mediumgroot (180 g)
Waatlemoen	1 sny (250 g)
Waatlemoen, blokkies	1¼ koppie (250 g)
Nartjies	2 mediumgroot (150 g)
Aarbeie	1¾  koppie (300 g)
Pynappels	3 dun snye (125 g)
Pynappels, blokkies	¾ koppie (125 g)
Turksvye	2 groot (180 g)
Pere	1 klein (100 g)
Pruimedante	3 klein (25 g)
Pruime	2 groot (150 g)

Daar het jy dit! Mag diabete vrugte eet? Ja – mits hulle porsies versigtig benader en dit nie hul bloedsuikervlakke te veel opstoot nie.

Wat dink jy? Eet jy vrugte?